شيئ من الخوف
طبعاً هقول "مبارك" ليا أول رئيس منتخب
أول مرة أقعد أستنى النتيجة
قعدت عالكنبة و في الميدان
على تويتر و على صفحة الإخوان
قدام قناة الجزيرة و يمكن الفراعين
قعدت زي اللي مستني نتيجة الثانوية
شعب كله مستني ثانويته
شعب خايف
على ثورته
مش ثورة فصيل فيه
شعب ناوي
على نهضته
بإرادة كل فرد فيه
شعب عارف
يصون ثروته
بعد كل السرقة فيه
شعب عاند
و سقط فلوله
رغم سوء اختيار مرشحيه
و هنا الشعب بعد ما بارك لنفسه
رغم إنه عارف إن الجماعة بتبارك لنفسها
المهم
الشعب عايز إيه ؟
الشعب جرب في النقابات
اتحسر على طريقة اختيار التأسيسية مرتين
شاف آداء معين في البرلمان
راقب طريقة الكلام في الاعلام
و بعدما خلص من قناة الفراعين
قدامه لسه قناة 25
قدامه يمين بالبيعة
يمين متين
بيعة يجب أن يتخلص منها مرسي بنفسه
قولاً
و الأهم بالطبع فعلاً
فآداء الاخوان امام اعين المهنيين في النقابات ليس في صالح مرسي مطلقاً
اكررها مطلقاً
قدامه ضحكة حسن البرنس و فلاليط صبحي صالح
قدامه تصريحات صفوت حجازي
لازم أقف قدام الراجل ده كويس
الراجل عنده قوة غير طبيعية
عنده باور يعني
بس الباور من غير كونترول مصيبة
و صفوت مثال للوضع ده
تصريحات تحسب على الدكتور مرسي
امتلاك لناصية المنصة في الميدان بشكل يذكرنا بطغيان كمال الشاذلي و أحمد عز على جوقة النظام القديم
قدامه ميراث حماس في غزة
حكومة حماس اللي ريسها لسه اخوان !
أو هكذا يبدو من احتفاله بنجاح مرسينا
قدامه ميراث 7000 سنة ظلم
مش 30 سنة زي ما الاعلام مصر يقول
قدامه 48% ماصوتولوش
يااااااه
لو بص هو بس للحمل ده هيفكر صح
لو بص لفرق التصويت للاخوان بين مجلس الشعب و الجولة الأولى للرئاسة
و بعدين بين الجولة الأولى للرئاسة و الجولة الثانية
و هو أستاذ هندسة
يعني أنا عايزه يبص من المنظور ده و يحلل
لو وصل لنتيجة أن اللي اداله من الغير اخوان قدام شفيق أكتر من الاخوان
اللي هي نتيجة واضحة يعني مش محتاجة أستاذ هندسة و لا حاجة
نتيجة بتقول أنها مقدمة
و أنتم عارفينني معرفش من علم المنطق يا مرسي إلا نظرية المقدمات تفضي دوماً للنتائج
هو حمل تقيل
ربنا يعين الريس مرسي عليه
و ربنا يعيننا على ورثنا التقيل
ورث 7000 سنة
ورث جهل و فقر و مرض
و وارث خوف
ممكن يكون خوف كبير أو قليل
مش مهم مصدر الخوف إيه
من الإعلام الداخلي و لا الخارجي ؟
من التاريخ و لا من الجغرافيا؟
من نظريات المؤامرة و لا من عمليات المؤامرة؟
من تحالفات غريبة و لا من علاقات أغرب؟
من التسلسل القيادي في الجماعة و لا من تجربة حماس ؟
من اللي بنشوفه في النقابات و لا فوق المنصات ؟
من علاقات بقطر و لا من علاقات بغيرها؟
من تعزيز العلاقات مع ايران و لا بمراجعة معاهدة السلام؟
المهم إن فيه شيئ من الخوف
!!محدش يقول هيبقى أوحش من مبارك يعني
مابتتقاسش كده اطلاقاً
إطلاقاً
تعليقات
إرسال تعليق