الموبايل من الأمان للادمان

من كام سنة كان التليفون مجرد وسيلة تواصل للتهاني والتعازي او الاطمئنان على الصحة والاحوال، لكن من وقت ظهور التليفون المحمول والثقافة اتغيرت، الواحد فاكر كويس ازاي ان قبل المحمول كان يبقى مسافر وأهله ممكن مايبتدوش يقلقوا عليه انه إتأخر الا بعد 10 ساعات مثلا من خروجه من البيت او من المعاد المتوقع لرجوعه، يعني كان الواحد ينزل مشوار الساعة 8 الصبح من كفر الشيخ لطنطا عشان يقدم ورقه في مكتب التنسيق وممكن عالساعة 6 او 7 المغرب كده يبتدي الأهل يقلقوا، دلوقتي لو ابنك نزل يجيب حاجة وقعت منك من البلكونة تقول له خد موبايلك معاك وتقلق لو اتأخر 13 ثانية!
الموبايل المفروض انه وسيلة اتصال وتواصل، لكن دلوقتي بقى بيقرب البعيد ويبعد القريب، كل واحد قاعد على موبايله بيقلب في التايملاين وبيحلفه انه يطلع اخبار جديدة ولا بوستات حديثة... ممكن تبقى عارف اخبار حد في امريكا لكن ماتعرفش اخوك في سنة كام في المدرسة ولا بيروح مدرسة ايه... بتشات وتتكلم مع ناس تعرفهم او ماتعرفهمش لكن ممكن ماتستحملش كلمتين مع اللي عايشين معاك في البيت!
مؤخرا بقى فيه امراض مرتبطة باستخدام الموبايل، جرايم مرتبطة بالموبايل.. وكمان حوادث ومشاكل سببها الموبايل، كلنا شفنا مثلا الهوس وكمان التحذيرات من لعبة انتشرت كالنار في الهشيم اسمها البوكيمون...
الموضوع ده النهارده بقى واخد اهتمام عالمي واسع، وبقت مشكلة ضخمة: #ادمان_الهواتف_النقالة... ولازم عشان تحل مشكلة زي دي انك تعترف اولاً بيها وبوجودها... ده كده نص الطريق للعلاج... يبقى لازم تفكر وتحلل، لازم تراقب استخدامك وتشوف انت بتستهلك وقت قد ايه عالموبايل، ما بين العاب وتشات وتصفح مواقع ومراجعة صفحة #فيسبووك او #تويتر او #انستجرام... لازم تعرف وتقرر... هو انت لازم ترفرش الصفحة كل 3 ثواني او تبص عالميل كل نص ساعة!
تاني حاجة لازم تعملها انك لازم تبقى اجتماعي فعلا وفعلياً، يعني انزل قابل الناس والاصدقاء والاقارب والزملاء واتكموا بجد، عاوزين تلعبوا العبوا بجد، كورة او سباحة او حتى بالدراجات... جربت تاخد صحابك وتروح تأجر ساعة تنس طاولة وتلعبوا!
تالت حاجة  إنك وانت في شغلك لازم تفصل وتنعزل، لو بتذاكر او بتشتغل لازم تبعد عن عادة تصفح المواقع الاجتماعية كل 5 دقايق، اهم قنلة الوقت هم مواقع التواصل (التفاصل) الاجتماعي، وقت شغلك او مذاكرتك أهم، وظفه صح.
مش لازم الناس تعرف انتي طابخة ايه النهارده، الطعام يمر من الطبق للفم للمعدة كي تتم عملية الهضم ومش لازم الطعام يعدي ع #الواتساب الأول عشان تبقى صحتك وصحة عليتك جيدة، لازم نفكر ونقرر اننا نعيش اللحظات زي ما كنا بنعيشها قبل هوس المواقع الاجتماعية، اه بنصور لحظاتنا الجميلة والممتعة واه لازم يبقى فيه توثيق للحظات معينة من عمرنا بس مش لدرجة ان حياتنا كلها تكون عالنت.
آخر نصيحة ان فيه اوقات لازم يكون الموبايل فيها مقفول فعلا، او لا يستخدم في وقتها، عالطعام... في خروجة العيلة، في لمة العيد عند الجد والجدة، في اوقات المذاكرة والشغل، في اوقات وايام الامتحانات، وفي كل لحظة انت حاسس انك لازم تعيشها مع اللي بتحبهم.

دي نصيحة خارج السياق، بلاش موبايل وانت سايق عربيتك او دراجتك.