task force

زمان أيام المدونات، وقبل الفيس بوك وتويتر، قبل ما أعرفهم يمكن، وقبل ما يكون فيه حد بيقرا كلام أنا بكتبه لأن المدونات مختلفة في آلية النشر والوصول للمحيطين غير ما نحن عليه الآن، زمان وفي عز إكتئابي من نظام مبارك ومن تدهور حال البلد وخدماتها واختياراته لمسؤوليه عنا، قلت يعني هي البلد محتاجة كام واحد وواحدة عشان تتعدل؟

ماهو التغيير التحتي بياخد وقت والأخلاق والتدين والتعامل أو والمعاملات وصلوا لتحت مستوى سطح البر والبحر والمعقول بمراحل، والباقي من الزمن أقل من القليل، فعلا الوقت عامل ضدنا بصورة مرعبة لأننا لا نقدره ولا نقيمه، والتغيير الفوقي هييجي ازاي؟ بنبي؟ برسول؟

برضه النبي ولا الملاك ولا الرسول ولا المبعوث المخلص ده هياخد معانا وقت وجهد، وأعتقد إننا بقينا عاملين أصلا زي بني إسرائيل، نكذب الأنبياء ونقتل المبعوثين، ونتحدى الله ونتحايل عليه ونظن أن فهلوتنا هي الرزق وأن رزقنا بيدنا، فهل هيقدر أي واحد لوحده إنه يعمل حاجة؟

اقتنعت انه مش هيقدة لوحده، واحنا مش بيحكمنا نبي ولا رسول ولا ملاك ولا معصوم. . بس محتاجين كام واحنا 80 مليون وقتها، كل منا فسد وأفسد بطريقته، اللي بيورث واللي بيرشي واللي بياخد اكرامية واللي بيزوغ من شغله واللي بيشتغلنا وبيقول لنا اينه بيشتغل لنا. .

محتاجين كام؟
10 مليون؟
مليون؟
100 ألف؟

نزلت بسقف توقعاتي وأحلامي ووصلت لسقف محدود جداً وهو الألف بني آدم، رئيس ومعاه Task force . . حكومة 30 وزير، 30 وكيل وزارة لكل وزارة. . 30 محافظ. . هل مصر مافيهاش الف ولا الفين مواطن يقدروا يعملوا الفرق؟ يكونوا مخلصين للبلد وأمناء وعارفين ربنا وشاطرين في الادارة والمتابعة؟

فرقة موت متاح ليها 3 سنين شغل او اي مدة زمنية بتحددها علوم الادارة والتخطيط، ويا ينقذوا البلد بقوانين عادلة وناجزة تطبق عالكل ومعاها توعية للعقول الصدئة والقلوب الخربة اللي اتعودت عالفساد والقبح وبقت مفسدة ومصدرة للقبح في محيطها. . ولو فشلت فرقة الموت دي يحكموا على نفسهم بالسجن او الاعدام، ولو نجحوا فقد أنقذوا أمة تهوي ولا تدري.

القضية كلها في الارادة والادارة، لازم السيسي يكون عنده الارادة وبعدين يفعل الادارة الرشيدة، وبمناسبة مولد مجلس النواب، لا بعتقد انه عمره أفرز ولا هيفرز ناس صالحة تشرع ولا تدير بلد، للأسف مجلس مصالح لأن مفيش عيلة ولا قبيلة من اللي عايشين حوالينا بتدور غير على مصالحها، وأما عن القبلية المصرية فده موضوع تاني.

لكن النهارده، فين تحركات السيسي واللي تحته، مش بتكلم عن ردود الفعل اللي معدة لامتصاص غضب الناس من موجة المطر. . فين أ ب تحرك لمنع خروج نفس الصور والفيديوهات والميموريز العام القادم في النوة الأولى في 2015؟

حد عارف يعني ايه سؤال قدام ربنا؟